Fyrsta sinn í sjö ár sem Real Madrid vinnur ekki Getafe

Getafe og Real Madrid gerðu markalaust jafntefli í síðasta leik dagsins í spænsku úrvalsdeildinni.

Þetta er í fyrsta sinn síðan 2012 sem Real Madrid mistekst að vinna Getafe.

Stigið gerði meira fyrir Getafe sem komst aftur upp í 4. sæti deildarinnar. Sevilla var nokkra klukkutíma í 4. sætinu eftir stórsigur á Rayo Vallecano, 5-0, fyrr í dag.

Real Madrid var meira með boltann í leiknum í kvöld en komst lítt áleiðis gegn sterkri vörn Getafe sem hefur aðeins fengið 29 mörk á sig í deildinni.

Real Madrid er í 3. sæti deildarinnar og allar líkur eru á því að liðið endi þar.