Andri Lucas ískaldur á vítapunktinum | Myndbönd

Andri Lucas Guðjohnsen gerði sér lítið fyrir og skoraði þrennu þegar íslenska U-17 ára landsliðið í fótbolta gerði 3-3 jafntefli við Þýskaland í milliriðli undankeppni EM 2019 í dag.

Þjóðverjar komust þrisvar yfir í leiknum en Andri Lucas jafnaði í öll skiptin og sá til þess að íslenska liðið náði í dýrmætt stig. Ísland er á toppi riðilsins með fjögur stig. Íslendingar mæta Hvít-Rússum í lokaleik sínum í milliriðli á þriðjudaginn.

Þýskaland náði forystunni strax á 6. mínútu en Andri Lucas jafnaði tólf mínútum síðar. Þjóðverjar komust aftur yfir á lokamínútu fyrri hálfleiks og þeir leiddu, 2-1, þegar liðin gengu til búningsherbergja.

Á 50. mínútu fékk Ísland vítaspyrnu. Andri Lucas fór á punktinn og skoraði af öryggi. Þýskaland komst yfir í þriðja sinn á 58. mínútu en þremur mínútum síðar fékk Ísland annað víti. Aftur steig Andri Lucas fram og skoraði sitt þriðja mark. Vítamörk Andra Lucasar má sjá hér fyrir neðan.

3-3 Andri Lucas Gudjohnsen. Hat-trick#TeamTotalFootballpic.twitter.com/N33X2KmD24

— Total Football (@totalfl) March 23, 2019

Andri Lucas, sem er á mála hjá Real Madrid, hefur alls skorað átta mörk í 15 leikjum fyrir U-17 ára landsliðið. Hann hefur einnig skorað tvö mörk í fimm leikjum fyrir U-19 ára landsliðið.