Vilja að skólinn byrji seinna á morgnana

Framhaldskólanemar segja nauðsynlegt að hlustað sé á raddir ungs fólks í umræðunni um það hvort breyta eigi klukkunni. Þeim þykir misjafnlega auðvelt að vakna á morgnana en flestir þeirra menntaskólanema sem fréttastofa ræddi við eru sammála um að skólinn eigi að byrja seinna á morgnana.

Hátt í 1.300 umsagnir hafa borist inn í samráðsgátt stjórnvalda þar sem fólk lýsir afstöðu sinni til þess hvort seinka eigi klukkunni. Rannsóknir hafa sýnt fram á það að það kynni að hafa í för með sér jákvæð áhrif á svefnvenjur Íslendinga, einkum á unga fólkið.

Ráðgjafahópur umboðsmanns barna í samstarfi við Nemendafélag Menntaskólans við Hamrahlíð stóð fyrir fundi um svefnvenjur og klukkubreytingar í gær og komust færri að en vildu.

„Rödd unga fólksins er mjög mikilvæg í þessu máli af því að þetta hefur svo mikil áhrif á líðan ungs fólks og mikill svefn er svo mikilvægur fyrir alla,“ segir Hákon Darri Egilsson, nemandi við skólann.

Í spilaranum hér fyrir neðan má heyra álit fleiri nemenda á mögulegum breytingum á klukkunni.