Klopp: Salah gaf Firmino vítaspyrnuna í jólagjöf

Roberto Firmino fékk vítaspyrnu í jólagjöf frá Mohamed Salah og sagði Jurgen Klopp það hafa verið eitt það fallegasta sem hann hafi séð.

Salah hafði nú þegar skorað úr vítaspyrnu þegar Liverpool fékk aðra vítaspyrnu í 5-1 sigrinum á Arsenal í ensku úrvalsdeildinni í gær. Egyptinn ákvað því að leyfa Firmino að taka spyrnuna en Brasilíumaðurinn fullkomnaði þrennuna með marki úr vítinu. 

„2018 lýkur með jólagjöf frá Salah. Ég elska þetta, þetta var svo fallega gert af honum,“ sagði Klopp eftir leikinn.

„Ég var ekki svo ánægður á því augnabliki því Bobby klárar oftast ekki vítin sín á æfingum. En hann hitti á sinn dag í dag og það er frábært.“

„Þetta var eitt af því fallegasta sem ég hef séð. Ég veit ekki um marga sem hefðu gert þetta.“

Liverpool situr á níu stiga forskoti á toppi ensku úrvalsdeildarinnar eftir sigurinn í gærkvöld.