Heimir: Það næst enginn árangur með því að reka þjálfara tvisvar á ári

Heimir Hallgrímsson sagði Katar „staðinn til að vera á“ þegar að hann var kynntur til leiks á blaðamannafundi Al Arabi í gær þegar að Vestmannaeyingurinn tók formlega við stjórnartaumunum hjá félaginu.

Al Arabi hefur sjö sinnum orðið katarskur meistari en ekki náð tilsettum árangri undanfarin ár og hafa stuðningsmennirnir verið að fjarlægjast félagið. Þessu vill Heimir kippa í liðinn en það mun taka sinn tíma.

„Hér vita allir að þetta er ekki skammtíma verkefni. Hér er ekki verið að kaupa sér árangur strax í dag, þetta er langtíma verkefni til að ná árangri til framtíðar,“ sagði Heimir á blaðamannafundinum.

Al Arabi er ekki þekkt fyrir mikla þolinmæði en Heimir er 18. þjálfarinn sem er ráðinn til starfa á síðustu átta árum.

#العربي يقدم المدرب الجديد https://t.co/WDiFJ7nszJ#WelcomeHeimir#العربيpic.twitter.com/sfkodGQyV8

— Al-Arabi Sports Club (@alarabi_club) December 11, 2018

„Margir hafa varað mig við því að þjálfarasætið hérna sé ansi heitt þannig að vonandi getur maður frá Íslandi kælt það örlítið,“ sagði Heimir léttur að vanda.

„Allt sem ég hef heyrt frá forsetanum og félaginu í mínum samræðum við fólkið segir mér að ég fái stuðning og ég trúi því. Það næst enginn árangur með því að reka þjálfara tvisvar sinnum á ári,“ sagði Eyjamaðurinn.

Heimir var að sjálfsögðu spurður út í tannlækningar og hvort hann mundi stunda þær í Katar en svo verður ekki.

„Ég er svo sannfærður um að ég verði hér næstu árin að ég ætla ekki að stunda neinar tannlækningar,“ sagði Heimir Hallgrímsson.