Ginola útskýrir hvað gerðist þegar að Keegan öskraði frá sér titilinn

Tímabilið 1995/1996 í ensku úrvalsdeildinni var heldur betur eftirminnilegt en hinir svokölluðu „skemmtikraftar“ Kevins Keegans í Newcastle áttu titilinn vísan þegar að þeir voru mest með tólf stiga forskot á Manchester United.

Smám saman saxaði United á forskotið og var komið á toppinn í apríl. Undir lok þess mánaðar vann Newcastle 1-0 sigur á Leeds og minnkaði muninn á toppnum í þrjú stig en Newcastle átti þá leik til góða.

Fyrir leik Newcastle og Leeds hafði Sir Alex Ferguson látið þau orð falla að lið eins og Nottingham Forest myndi ekki leggja allt í sölurnar á móti Newcastle en lærisveinar Keegan átti leik á móti Forest nokkrum dögum síðar.

Newcastle hafði samþykkt að spila heiðursleik Stuart Pearce á móti Forest sama ár og lék Ferguson sér að því að rugla í Keegan með því að segja að Nottingham Forest myndi ekki reyna á sig.

Keegan beit á agnið og gjörsamlega missti vitið í viðtali við Sky Sports eftir sigurinn á Leeds. Þessi eldræða hans um Ferguson er talin hafa verið síðasti naglinn í líkkistu Newcastle þetta tímabilið en það gerði 1-1 jafntefli við Forest á meðan United vann Middlesbrough 3-0 og vann deildina með fjögurra stiga mun.

David Ginola var leikmaður Newcastle þetta tímabilið en hann var látinn rifja þetta upp í Monday Night Football á Sky Sports í byrjun vikunnar. Hann útskýrði þar hvaða áhrif þetta hafði á Newcastle-liðið.

„Við vorum inn í búningsklefanum en heyrðum samt í honum. Við fórum meira að segja fram á gang því við héldum að það væri eitthvað í gangi. Leikmennirnir hlupu fram til að hjálpa honum því hann var öskrandi á alla,“ sagði Ginola.

„Hann var virkilega pirraður því hann áttaði sig á því að hlutirnir væru að renna honum úr greipum. Þetta var mikil synd,“ sagði hann en Jamie Carragher spurði hvort þessi ástríða Keegans væri bæði styrkleiki hans og veikleiki eins og í þessu tilviki?

„Þetta var bæði styrkleiki og veikleiki, svo sannarlega. Við sáum þarna þegar að hann var svona stressaður að hann var að missa sjálfstraustið. Þá spurði maður sig hvort hann gæti tekið réttar ákvarðanir á næstu dögum og vikum því hann var orðinn svo æstur,“ sagði David Ginola.

Alla umræðuna um þetta skemmtilega tímabil má sjá hér að neðan.