Hamrén: Þessi leikur er mikil áskorun

Erik Hamrén landsliðsþjálfari staðfesti í morgun að Emil Hallfreðsson myndi ekki spila vegna meiðsla og óvissa er með þrjá aðra. Æfingarnar hafa verið vel nýttar hér ytra og það þarf ekki að koma á óvart hvað hefur helst verið æft.

„Undurbúningurinn hefur aðallega verið nýttur til þess að laga varnarleikinn sem var ekki nógu góður í fyrstu leikjunum í Þjóðadeildinni,“ segir Hamrén en það hefur verið lög áhersla á fleiri atriði.

„Við höfum líka verið að æfa föstu leikatriðin sem hafa ekki verið að virka. Einn af okkar helstu möguleikum til þess að skora í svona leik er eftir fast leikatriði.

„Við erum að spila við mjög sterkt lið á útivelli og búumst við því að þeir verði meira með boltann. Þetta er mikil áskorun fyrir okkur og gaman að sjá hvort við tökum skref fram á við.“

Landsliðsþjálfarinn býst þó ekki við að vera í vörn allan tímann og vill sjá hugrekki hjá liðinu er það hefur boltann.

„Ég vil sjá gæði í okkur er við höfum boltann. Ef við erum bara að hugsa um vörn þá munum við lenda í erfiðleikum. Það verða líka að vera gæði í föstu leikatriðunum. Minni liðin geta verið sterkari þar en stóru liðin.“

Gylfi Þór Sigurðsson verður áfram landsliðsfyrirliði í fjarveru Arons Einars og hann er orðinn mjög spenntur.

„Að spila á móti heimsmeisturunum í Frakklandi er eitthvað sem gerist ekki á hverjum degi. Allir í hópnum bíða spenntir eftir leiknum. Það er skemmtilegast að spila gegn bestu liðunum og bestu leikmönnunum og þetta er einn af þeim leikjum.“