Fótbolti

Óttast að konur verði graðar á að horfa á karlmenn í fótbolta

Henry Birgir Gunnarsson skrifar
Hluti af konunum sem fengu að sjá landsleikinn í vikunni. Þær skemmtu sér konunglega.
Hluti af konunum sem fengu að sjá landsleikinn í vikunni. Þær skemmtu sér konunglega. vísir/getty

Karlarnir í Íran eru ekki enn farnir að leyfa konum að horfa á fótboltaleiki þar í landi þó svo þeir þykist vera að stíga skref í rétta átt.

Fyrr í vikunni fengu örfáar konur að sjá landsleik Írans og Bolívíu en almennt er litið á þann gjörning sem sýndarmennsku. Konurnar voru girtar af á sérstöku svæði með öryggisgæslu allt í kringum sig.

Stjórnvöld í Íran hafa meinað konum frá því að sækja íþróttaviðburði í áratugi og konur hafa reynt að lauma sér inn á völlinn klæddar sem karlar. Það gengur sjaldnast og þá er þeim hent af vellinum eða hreinlega fangelsaðar.

Forseti FIFA, Gianni Infantino, var mikið gagnrýndur í mars er hann mætti á landsleik í Íran þar sem fjöldi kvenna reyndi að lauma sér inn. Hann gagnrýndi Írana ekkert þá.

Dómsmálaráðherra Íran, Mohammad Jafar Montazeri, var allt annað en ánægður með að konum var hleypt á landsleikinn og hótar refsingum ef þetta heldur svona áfram.

„Ég mótmæli harðlega veru kvenna á landsleiknum. Við erum múslimskt ríki. Við erum múslimar,“ sagði Montazeri sem virðist helst óttast að konur verði graðar af því að sækja knattspyrnuleik.

„Við munum taka á þeim sem ætla sér að hleypa konum á knattspyrnuvelli. Þegar kona fer á völlinn og sér hálfnakta karlmenn í íþróttafötum þá mun það leiða til syndar.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.