Klopp: Tottenham er eitt besta lið heims

Jurgen Klopp, stjóri Liverpool, hrósar liðsmönnum sínum í hástert eftir 1-2 sigur Liverpool á Tottenham í hádegisleiknum í enska boltanum.

„Við verðskuldum þennan sigur. Í 85 mínútur stjórnuðum við leiknum. Bæði þegar við vorum með og án boltans vorum við að valda þeim miklum vandræðum. Strákarnir fóru eftir leikplaninu og þetta var frábær frammistaða,“ sagði Klopp eftir leikinn.

Liverpool er með fullt hús stiga á toppi deildarinnar eftir fimm umferðir en Klopp segir þetta hafa verið besta leik liðsins á tímabilinu til þessa.

„Þetta var besti leikur okkar á tímabilinu og frammistaðan var miklu betri en úrslitin segja til um. Þetta var mjög erfiður leikur. Tvö stórlið að spila fótbolta eins og hann á að vera spilaður. Þegar maður vinnur Tottenham á útivelli eru það risastór úrslit.“

„Tottenham er eitt besta lið heims og að koma hingað og spila svona eftir landsleikjahlé. Ég gerði ekki kröfu á það. Við vorum góðir varnarlega og sóknarlega. Ég get ekki gagnrýnt neitt í leik míns liðs í dag,“ sagði Klopp.