Klopp var viss um að Alisson myndi gera mistök

Jurgen Klopp, stjóri Liverpool, segir að Alisson myndi alltaf gera mistök með þessum háskaleik sínum í öftustu línu en var ekki viss um að þau myndu koma svo snemma á hans ferli hjá Liverpool.

Alisson var að leika sér að eldinum gegn Brighton í síðustu viku og var nærri því að gefa mark. Í gær gaf hann Leicester svo mark eftir að hafa reynt að sóla sóknarmann Leicester sem hirti af honum boltann.

„Við verðum að læra allir að þessu, ekki bara hann. Það var staðfest eftir síðustu viku að þetta myndi einhvern tímann gerast en ég hélt að það myndi ekki gerast strax núna,” sagði Klopp.

„Við hefðum getað hreinsað boltanum burt í tvígang áður en svo gáfum við til baka á hann, og já, hann hefði getað sparkað þessu í burt einnig.”

„Ég sagði við hann að þetta hafi verið besti leikurinn til þess að gera þessi mistök því við unnum svo þetta er allt í góðu núna.”