Leita að húsnæði undir nýtt gistiskýli

Ráðist verður í kaup á nýju neyðarskýli fyrir unga heimilislausa vímuefnaneytendur í Reykjavík. Tillaga þess efnis var samþykkt á fundi velferðarráðs í dag þar sem fjölmennur hópur ræddi erfiða stöðu utangarðsfólks í borginni.

Fundarmenn komu  víða að, m.a. frá Geðhjálp, SÁÁ, Gistiskýlinu við Lindargötu og Rauða krossinum, svo fá dæmi séu nefnd – auk borgarfulltrúa og einstaklinga sem sjálfir eru heimilislausir. Margir þeirra sem tóku til máls gagnrýndu samskiptaleysi borgaryfirvalda. Þannig lagði Geðhjálp m.a. fram skriflegt erindi þar sem bent er á að samtökin hafi í tvígang sent erindi vegna aðstæðna utangarðsfólks á síðustu tveimur árum, en engin svör fengið.

Borgaryfirvöld vilja gera betur

„Við getum örugglega tekið okkur á þar. Mér finnst auðvitað leiðinlegt að heyra að það hafi verið upplifunin hingað til, en við erum full af vilja gerð til þess að gera betur,“ segir Heiða Björg Hilmisdóttir, formaður velferðarráðs.

Nokkrum tillögum minnihlutans var vísað í stýrihóp, en þær sneru m.a. að kaupum á ónotuðu skrifstofuhúsnæði, úthlutun svæðis fyrir hjólhýsi og húsbíla til framtíðar, könnun möguleika á nýtingu færanlegs húsnæðis sem neyðarúrræðis og að dagskýli verði komið upp fyrir haustið. Dagsetur var áður rekið við Eyjaslóð, en í dag eru slík úrræði ekki til á vegum borgarinnar.

„Fjölbreytt dagúrræði er vissulega þörf fyrir, en ég er ekki endilega á því að það sé sniðugt að hafa eitt stórt slíkt,“ segir Þór Gíslason, forstöðumaður gistiheimilisins við Lindargötu.

Hann segir æskilegra að bjóða upp á fleiri og fjölbreyttari úrræði sem henti ólíkum hópum.

Gistiheimili og húsnæði fyrir nýtt neyðarskýli

Heiða Björg telur rétt að fara aðrar leiðir en að setja upp hjólhýsasvæði.

„Við erum að horfa á húsnæði fyrir fólk. Við lítum ekki beint á hjólhýsi eða tjald sem húsnæði, þannig að það er ekki úrræði,“ segir Heiða.

Tvær tillögur meirihlutans voru hins vegar samþykktar í velferðarráði. Önnur þeirra snýr að kaupum eða leigu á gistiheimili með 25 íbúðareiningum fyrir þá sem bíða eftir félagslegu húsnæði. Hins vegar var samþykkt að kaupa nýtt húsnæði fyrir neyðarskýli fyrir unga heimilislausa einstaklinga í vímuefnaneyslu.

„Við sjáum það fyrir okkur þannig að það verði keypt nýtt húsnæði fyrir yngri hópinn og eldri hópurinn haldi áfram að vera á gamla staðnum. Hann svona haldi áfram og hugsanlega má breyta honum að hluta í framhaldinu í varanlega búsetu,“ segir Heiða Björg.