Brentford sankar að sér ungum Íslendingum

Kolbeinn Birgir Finnsson hefur skrifað undir tveggja ára samning við enska B-deildarliðið Brentford en frá þessu er greint á heimasíðu félagsins í dag. Þar segir jafnframt að Kolbeinn hafi staðist læknisskoðun síðastliðinn föstudag.

Kolbeinn Birgir er 18 ára gamall og var á mála hjá hollenska úrvalsdeildarliðinu Groningen en samningur hans þar rann út nýverið.

Hann er á nítjánda aldursári og ólst upp hjá Fylki. Hann lék níu leiki með Árbæjarliðinu í Pepsi-deildinni sumarið 2015 áður en hann var seldur til Hollands. Hann á 27 landsleiki að baki fyrir yngri landslið Íslands og hefur verið viðloðandi U-21 árs landsliðið að undanförnu.

Kolbeinn er annar Íslendingurinn til að skrifa undir hjá Brentford á stuttum tíma en markvörðurinn Patrik Sigurður Gunnarsson gekk til liðs við félagið á dögunum frá Breiðabliki.

✍ Brentford have snapped up Icelandic youngster Kolbeinn Finnsson on a two-year contract#WelcomeKolbeinn pic.twitter.com/Nq8djL1o62

— Brentford FC (@BrentfordFC) June 11, 2018