Fótbolti

Vel undirbúinn fyrir þær stóru ákvarðarnir sem skiluðu Íslandi á HM

Tómas Þór Þórðarson í Kabardinka skrifar
Heimir Hallgrímsson óttast ekki stórar ákvarðanir.
Heimir Hallgrímsson óttast ekki stórar ákvarðanir. vísir/vilhelm

Heimir Hallgrímsson, landsliðsþjálfari Íslands í fótbolta, þurfti að taka stórar ákvarðanir eftir að hann tók einn við ábyrgð íslenska liðsins þegar að Lars Lagerbäck kvaddi eftir Evrópumótið í Frakklandi árið 2016.

Eyjamaðurinn gerði nokkrar breytingar á annars fastmótuðu byrjunarliði, hrærði meira í liðinu á milli leikja og breytti meðal annars um leikaðferð eftir að liðið var búið að spila þá sömu í nokkur ár með frábærum árangri.

Heimir þorir og það skilaði liðinu sigri í erfiðasta riðli undankeppni HM 2018 og nú er Ísland með eitt stig eftir jafntefli við tvöfalda heimsmeistara Argentínu í fyrsta leik.

Hann hefur heillað heiminn með árangri sínum og hann er eðlilega ekkert síður vinsæll innan íslenska hópsins eins og kom fram í máli Davíðs Snorra Jónassonar, eins af njósnurum íslenska liðsins.

Eyjamaðurinn er oftast léttur en getur stundum misst sig. vísir/getty

Lætur manni líða vel

„Mér finnst hann vera frábær og allt hans teymi. Það sem að Heimir gerir vel er að vinna vel með aðstoðarmönnunum sínum. Helgi og Gummi eru að vinna mikla vinnu á bakvið tjöldin. Síðan er Heimir góður að gefa þér skýr hlutverk sem að hann vill að séu kláruð vel,“ segir Davíð Snorri um Heimi en hann fór yfir það sem gerir Eyjamanninn að svona öflugum þjálfara í Akraborginni á X977.

„Hann lætur öllum líða vel í því umhverfi og að sama skapi er hópurinn að taka mjög vel á móti þeim sem koma inn. Það eru nýir starfsmenn eins og ég en hlutverkin eru skýr og hann lætur manni líða vel. Heimir hefur sýnt það bæði taktískt og með því hvernig hann hvetur áfram leikmenn að hann mjög góður þjálfari.“

Heimir er með milljón krónu bros og kemur alltaf vel fyrir en eins og kom fram um daginn getur hann tekið léttan trylling þegar að hann er ekki sáttur. Davíð segir hann almennt mjög léttan.

„Þetta er bara hans karakter. Hann er mjög almennilegur. Ég þekki hann ekki öðruvísi. Hann er alveg frábær,“ segir hann.

Heimir er góður að ræða við leikmenn maður á mann. vísir/vilhelm

Taktíkin á hreinu

Það eru margir þættir sem þjálfarar þurfa að vera með á hreinu ef þeir ætla að ná langt. Taktík er eitt og mannleg samskipti er annað sem er ekki síður mikilvægt. Hann virðist vera með allt á hreinu að mati Davíðs.

„Það sem ég hef séð er að hann er góður maður á mann. Hann getur átt góð samskipti maður á mann. Hann er gríðarlega vel undirbúinn og ef maður er vel undirbúinn líður manni betur og þá er líklegra að maður nái einhverju út úr því sem maður er að gera,“ segir Davíð.

„Taktíkin er líka alveg á hreinu og hann er með öll smáatriði sömuleiðis á hreinu. Ég er ekki á æfingasvæðinu á hverjum degi en miðað við þau samskipti sem ég hef átt við Heimi er þetta þannig.“

Uppleggið gegn Argentínu heppnast fullkomlega hjá Heimi og hans mönnum. vísr/vilhelm

Vel undirbúinn

„Teymið í kringum Heimi er líka á fullu að vinna í því að hvetja leikmennina og undirbúa þá fyrir leiki. Þeir vinna mikla vinnu. Heimir er hausinn á þessu en saman mynda þeir skemmtilegt teymi. Það er hrikalega gott að vinna með Gumma og Helga,“ segir Davíð Snorri.

Heimir var langt því frá að setja blindandi á asnann þegar að hann gerði þær breytingar sem virkuðu svo vel í undankeppninni og nú á HM. Það eru miklar pælingar á bakvið allt sem að hann og teymið hans geri.

„Hann tók stórar ákvarðanir sem að virkuðu. Það sýnir bara að menn eru virkilega að vinna vinnuna sína vel. Þú tekur ekki ákvarðanir nema vera búinn að skoða alla vinkla og þær hafa verið réttar hjá honum. Hann er mjög góður í þessu,“ segir Davíð Snorri Jónasson.

Vísir er með öflugt teymi í Rússlandi sem verður með ítarlegan fréttaflutning af íslenska liðinu á HM. Fylgist með á samfélagsmiðlum okkar - á FacebookTwitter og Instagram.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.