Mane skrifar undir langtímasamning við Liverpool

Sadio Mane, framherji Liverpool, hefur skrifað undir nýjan langtímasamning við félagið en þetta tilkynnti Liverpool í kvöld.

Samningurinn ku gilda til 2023.

Mane hefur farið á kostum í búningi Liverpool síðan að hann gekk í raðir Liverpool frá Southampton júní 2016 og hefur verið einn öflugasti framherji ensku úrvalsdeildarinnar.

Hann var kosinn besti leikmaður Liverpool á tímabilinu 2016/2017 og skoraði tíu mörk á síðasta tímabili í Meistaradeildinni er Liverpool fór alla leið í úrslitaleikinn en tapaði gegn Real Madrid.

„Ég er mjög, mjög ánægður með að framlengja við Liverpool. Þetta er frábær dagur fyrir mig og ég er er spenntur fyrir öllu; hjálpa liðinu og hjálpa félaginu að ná sínum draumum, sérstaklega að vinna titla,“ sagði Mane.

„Ég hef alltaf sagt það að þegar mér bauðst að koma hingað þá þurfti ég ekki að hugsa mig tvisvar um. Ég er í rétta félaginu á réttum tímapunkti með réttan stjóra. Fyrir mig, er þetta besta ákvörðun sem ég hef tekið á ferlinum.“

Sadio Mane agrees new long-term #LFC contract...

— Liverpool FC (@LFC) November 22, 2018