Níu látnir eftir skothríð í skóla í Peshawar

Að minnsta kosti níu manns eru látnir og 36 særðir eftir að byssumenn hófu skothríð í landbúnaðarskóla í pakistönsku borginni Peshawar í morgun.

Árásarmennirnir voru að minnsta kosti þrír talsins og dulbúnir í búrkur þegar þeir fóru inn í skólann og skutu á allt sem fyrir varð. Talsmaður pakistanska hersins segir að árásarmennirnir hafi allir verið drepnir.

Liðsmenn talíbana í Pakistan hafa þegar lýst ábyrgðinni á hendur sér.

Ofbeldi og hryðjuverkaárásir hafa verið mjög tíðar í borginni frá því talíbönum tók að vaxa fiskur um hrygg í Pakistan, en Peshawar er nálægt afgönsku landamærunum.

Lögregla segir að átta þeirra sem létu lífið hafi verið námsmenn og sá níundi lögreglumaður.