Töframaðurinn Harry semur við Birmingham

Harry Redknapp hefur samþykkt að halda áfram sem knattspyrnustjóri Birmingham og er búist við því að hann skrifi undir eins árs samning síðar í vikunni. BBC greinir frá.

Redknapp, sem oft er kallaður Harry Houdini, tók við Birmingham þegar Gianfranco Zola var rekinn í apríl og bjargaði Birmingham frá falli. Það er ekki í fyrsta sinn sem hann hefur bjargað liðum frá falli enda kallaður töframaðurinn.

Redknapp varð sjötugur í mars og er því einn allra elsti knattspyrnustjórinn í efstu fjórum deildum Englands ef ekki einfaldlega sá elsti.

Hann hefur á glæstum ferli stýrt West Ham, Tottenham og QPR en undir hans stjórn vann Birmingham tvo af síðustu þremur leikjum sínum og bjargaði sér frá falli með tveimur stigum.