Sunderland búið að finna eftirmann Moyes

Sunderland hefur ráðið Simon Grayson sem næsta knattspyrnustjóra liðsins. Hann tekur við starfinu af David Moyes sem sagði af sér í síðasta mánuði.

Grayson var síðast við stjórnvölinn hjá Preston þar sem hann gerði góða hluti. Hann hefur einnig stýrt Blackpool, Leeds United og Huddersfield á stjóraferlinum sem hófst árið 2005.

Sunderland hafði áður rætt við Derek McInnes, stjóra Aberdeen, um að taka við liðinu en hann afþakkaði boðið.

Grayson skrifaði undir þriggja ára samning við Sunderland sem féll úr ensku úrvalsdeildinni í vor. Sunderland lék síðast í ensku B-deildinni tímabilið 2006-07.