Mane gæti náð leiknum gegn Chelsea

Sadio Mane, leikmaður Liverpool, gæti náð stórleik liðsins gegn Chelsea á heimavelli á þriðjudaginn eftir að Senegal féll úr leik í Afríkukeppninni eftir vítaspyrnukeppni gegn Kamerún í gær.

Mane sem gekk til liðs við Liverpool síðasta sumar frá Southampton hefur verið frábær á fyrsta tímabili sínu í herbúðum Liverpool en hann hefur skorað níu mörk í nítján leikjum fyrir Rauða herinn.

Mane var þó skúrkurinn fyrir Senegal í gær en hann klúðraði fimmtu vítaspyrnunni gegn Kamerún eftir að allar níu spyrnurnar þar á undan höfðu ratað í netið. Var það því honum að kenna að Senegal komst ekki í undanúrslitin.

Stuðningsmenn Liverpool taka þessum tíðindum þó eflaust fagnandi en strax eftir leik bárust þess fréttir að Liverpool hefði sent einkaþotu á eftir Mane í von um að hann myndi ná leiknum gegn Chelsea.

Það má svo sannarlega segja að Liverpool hafi saknað Mane en liðið hefur aðeins unnið einn leik gegn Plymouth af sjö í fjarveru hans.

Er Liverpool fallið úr leik í báðum bikarkeppnunum eftir tap gegn Úlfunum í gær.