Obama mætti til að setjast í kviðdóm en var vísað frá

Barack Obama, fyrrverandi forseti Bandaríkjanna, mætti í dómshús í Chicago í gær þar sem hann hafði verið kallaður til að setjast í kviðdóm. Dómari vísaði forsetanum þó frá og ekki kom til þess að Obama sæti málið.

Engin ástæða var gefin fyrir því að Obama var vísað frá en það er ekki algengt að fólk sem kallað hefur verið til kviðdóms taki ekki sæti. Svo virðist sem Obama hafi verið valinn af handahófi til að taka ekki sæti. Hann hafði þó horft á kennslumyndband fyrir fólk sem situr í kviðdómi að því er kemur fram í frétt á vef BBC.

Obama kom í dómshúsið á miðvikudagsmorgun og fór í kringum hádegi. Fjöldi fólks kom saman til að berja 44. forseta bandaríkjanna augum.

Áður en hann yfirgaf bygginguna þakkaði hann öllum viðstöddum fyrir að taka að sér að sitja í kviðdómi. Einhverjir höfðu komið með eintak af bók hans í von um að fá eiginhandaráritun en aðrir, meðal annars starfsfólk dómsins, bað um mynd með forsetanum.

Ein kona sem var viðstödd sagði í samtali við svæðismiðil að henni hefði liðið eins og „bráðnandi smjöri“ þegar hún tók í hönd Obama.

Katie Hill, samskiptastjóri Obama, sagði í yfirlýsingu að forsetinn líti svo á að „mikilvægasta hlutverkið í lýðræði okkar sé hlutverk almennra borgara“ og að skylda fólks til að sitja í kviðdómi sé eitt mikilvægast hlutverk borgara.

Þetta er ekki í fyrsta sinn sem Obama er kallaður til setu í kviðdómi. Það gerðist líka árið 2010 þegar hann var í sínu fyrsta kjörtímabili sem forseti. Þá tók hann heldur ekki sæti en ástæðan þá var sú að hann átti fund með leiðtoga Kúrda.

Árið 2015 var George W. Bush kallaður til setu í kviðdómi en honum var einnig vísað frá eftir að hafa setið fyrir á nokkrum myndum.

Þá var Bill Clinton kallaður til setu í kviðdómi árið 2013 í máli er varðaði skotárás í New York. Honum var einnig vísað frá.