Puel fékk sparkið hjá Southampton

Southampton staðfesti nú í kvöld að búið væri að segja franska knattspyrnustjóranum Claude Puel upp störfum hjá félaginu.

Puel tók við Southampton síðasta sumar og undir hans stjórn endaði liðið í 8. sæti ensku úrvalsdeildarinnar í nýafstöðnu tímabili og komst í úrslitaleik deildabikarsins þar sem liðið tapaði fyrir Manchester United.

Þrátt fyrir það virtist ánægjan með störf Puels ekki vera mikil og núna er hann orðinn atvinnulaus.

Auk þess að vera við stjórnvölinn hjá Southampton hefur Puel stýrt Monaco, Lille, Lyon og Nice í heimalandinu.