Tyrkir biðja Bandaríkin um að endurskoða ákvörðun um vegabréfsáritanir

Yfirvöld í Tyrklandi hafa biðlað til Bandaríkjanna um að sú ákvörðun að stöðva vegabréfsáritanir frá Tyrklandi til Bandaríkjanna verði endurskoðuð. Nýjustu deilur ríkjanna hafa leikið Líruna og vegabréfamarkaði í Tyrklandi grátt.

Tyrkir hafa handtekið einn starfsmann ræðismannaskrifstofu Bandaríkjanna í Tyrklandi og gefið út handtökuskipun gagnvart öðrum. Báðir eru sakaðir um tengsl við klerkinn Fethulla Gulen, sem ríkisstjórn Recep Tayyip Erdogan saka um að hafa skipulagt valdaránstilraunina í fyrra.

Vilja Gulen

Gulen er í útlegð í Bandaríkjunum og hafa Tyrkir farið fram á að hann verði framseldur. Bandaríkin vilja hins vegar ekki gera það án sannana. Yfirvöld í Tyrklandi gripu til mikilla hreinsana eftir valdaránstilraunina og hafa minnst 40 þúsund manns verið handteknir og um 120 þúsund hafa verið reknir úr störfum sínum.

Sendiráð Bandaríkjanna í Ankara segir ásakanirnar gegn starfsmönnum Bandaríkjanna vera án nokkurs grundvallar. Gefið var út í gær að engar vegabréfsáritanir til Bandaríkjanna yrðu gefnar út þar til Tyrkir myndu tryggja öryggi starfsmanna sendiráða og ræðismansskrifstofa Bandaríkjanna.

Skömmu seinna sögðust Tyrkir ekki ætla að gefa út vegabréfsáritanir fyrir fólk sem hugðist ferðast til Tyrklands frá Bandaríkjunum.

Samkvæmt frétt Reuters var erindreki Bandaríkjanna kallaður til utanríkisráðuneytis Tyrklands í dag. Farið var fram á að ákvörðun Bandaríkjanna yrði afturkölluð þar sem hún myndaði óþarfa spennu á milli ríkjanna.

Dómsmálaráðherra Tyrklands segir það rétt yfirvalda að rétta yfir tyrkneskum ríkisborgara. Báðir starfsmennirnir sem um ræðir eru Tyrkir.

Deilt um nokkuð skeið

Tyrkir og Bandaríkjamenn hafa eldað grátt silfur saman um nokkuð skeið og þá sérstaklega vegna stuðnings Bandaríkjanna við sýrlenska Kúrda. Yfirvöld Tyrklands segja þá vera hryðjuverkamenn.

Önnur deilumál hafa einnig komið upp á milli ríkjanna eins og það þegar öryggisverðir Erdogan réðust á hóp friðsamra mótmælenda í Washington DC.

Samkvæmt frétt BBC hafa Tyrkir verið sakaðir um að halda fólki í gíslingu til að reyna að þvinga Bandaríkin til að framselja Gulen. Bandarískur prestur var handtekinn í Tyrklandi í fyrra og sömuleiðis hafa nokkrir Þjóðverjar verið handteknir.