Gary samdi við Lilleström en er nú búinn að semja við York

Gary Martin, fyrrverandi framherji ÍA, KR og Víkings, er búinn að gera skammtíma samning við enska félagið York City sem spilar í næst efstu utandeildinni eða sjöttu efstu deild á Englandi.

Þetta kemur fram á heimasíðu York en þar segir að hann spili leik á móti Curzon Ashton á laugardaginn.

Fram kemur í fréttinni á heimasíðu York að Gary sé laus allra mála eftir að hætta hjá belgíska félaginu Lokeren en það er ekki alveg rétt.

Gary samdi aftur við norska úrvalsdeildarfélagið Lilleström á dögunum til þriggja ára en þangað fór hann frá Víkingi um mitt tímabil 2016.

Gary, sem er uppalinn hjá Middlesbrough, æfði með Yok í dag og fær hann loks tækifæri að spila leik í meistaraflokki á Englandi eftir að spila í Ungverjalandi, Íslandi, Danmörku, Noregi og Belgíu.

Lilleström á enn eftir þrjá leiki í norsku úrvalsdeildinni en enski framherjinn kemur ekki til móts við norska liðið fyrr en yfirstandandi tímabili lýkur þar sem leikmanangluginn þar í landi er lokaður.