Skólum breytt eftir barnaníð

Breytingar hafa verið gerðar á öllum leikskólum í Kristianstad í Svíþjóð eftir að í ljós kom árið 2015 að barnaníðingur, sem starfað hafði á 26 leikskólum í afleysingum, hafði beitt um 20 börn á aldrinum eins til þriggja ára ofbeldi. Í mörgum tilfellanna tók hann myndir af börnunum með farsíma þegar hann var að skipta á þeim.

Gluggar hafa verið settir á salernisdyr í leikskólunum og skiptiborð eru höfð í augsýn allra. Auk þess er starfsmönnum bannað að nota eigin farsíma á meðan þeir eru í vinnunni. Símarnir verða læstir inni yfir daginn. Samkvæmt frétt sænska ríkissjónvarpsins eru ekki allir starfsmenn ánægðir með farsímabannið.

Barnaníðingurinn hefur verið dæmdur fyrir nauðgun, gróft kynferðislegt ofbeldi og barnaklám.