Siggi Raggi stýrir „Stálrósum“ kínverska landsliðsins í næstu tveimur leikjum

Sigurður Ragnar Eyjólfsson, fyrrverandi landsliðsþjálfari kvenna í fótbolta, mun stýra kínverska kvennalandsliðinu í næstu tveimur leikjum þess á móti Ástralíu í lok mánaðar.

Kínverska knattspyrnusambandið greinir frá þessu á Twitter-síðu sinni en Sigurður Ragnar hefur þjálfað Jiangsu Suning í kínversku úrvalsdeildinni undanfarin misseri.

Hann tekur við starfinu af Frakkanum Bruno Bini en Sigurður Ragnar er búinn að velja 26 leikmenn til að spila leikina tvo sem fara fram 22. og 26. nóvember.

Sigurður Ragnar þekkir það vel að stýra landsliði en hann þjálfaði íslenska kvennalandsliðið í sjö ár frá 2006-2013 og fór með það tvisvar sinnum á Evrópumótið.

Kínverska landsliðið, sem kallað er Stálrósinar, hefur um langa hríð verið eitt það sterkasta í heiminum. Það er í þrettánda sæti á styrkleikalista FIFA og komst í átta liða úrslit á síðustu Ólympíuleikum.

NATIONAL TEAM | The Icelandic Siggi Eyjolfsson will replace Bruno Bini as the coach of China in the two matches against Australia in the end of the month. #SteelRoses pic.twitter.com/S9WxLNwiAF

— China Women's Team (@ChinaWFT) November 9, 2017