Mál Møller Olsens fer fyrir Landsrétt
Mál Thomasar Møller Olsen verður tekið fyrir í Landsrétti snemma á nýju ári. Þetta staðfestir embætti Héraðssaksóknara við grænlenska ríkissjónvarpið KNR.
Olsen var þann 29. september síðastliðinn dæmdur í 19 ára fangelsi fyrir að hafa banað Birnu Brjánsdóttur og smygl á 23 kílóum af hassi. Dómnum var áfrýjað rúmri viku síðar.
Öll mál sem eru ódæmd 1. janúar næstkomandi verða rekin fyrir í Landsrétti. Leiddar höfðu verið líkur að því að sennilega yrði mál Olsens tekið fyrir af Landsrétti og það hefur verið staðfest nú með svari Héraðssaksóknara. Í Landsrétti þarf að endurtaka allar vitnaleiðslur en slíkt fyrirkomulag hefur ekki verið viðhaft í Hæstarétti. Nákvæm dagsetning réttarhalda liggur ekki fyrir.
Tengdar fréttir
Thomas Møller áfrýjar til Hæstaréttar
Málið gæti orðið eitt af þeim fyrstu sem fer fyrir Landsrétt ef það verður ódæmt fyrir Hæstarétti 1. janúar næstkomandi.
Þyngsti dómur á Íslandi í 23 ár
Thomas Möller Olsen var dæmdur í 19 ára fangelsi fyrir morð og fíkniefnasmygl í Héraðsdómi Reykjaness. Áhersla er lögð á að erlendir borgarar afpláni í heimalandi sínu.
Lauk afplánun mánuði áður en hann varð Birnu að bana
Thomas Møller Olsen hafði verið frjáls ferða sinna í rúman mánuð áður en hann varð Birnu Brjánsdóttur að bana. Hann var sakfelldur fyrir fíkniefnabrot í september 2015.
