Stjóralausir Leicester-menn unnu fyrsta sigurinn í tvo mánuði

Leicester sótti þrjú stig til Wales í 2-1 sigri gegn Swansea í dag en þetta var fyrsti leikur liðsins eftir að Craig Shakespeare var sagt upp störfum sem þjálfari liðsins á dögunum.

Leicester var aðeins búið að vinna einn leik af átta fyrir leiki dagsins og leika sex leiki í röð án sigurs þegar ákvörðun var tekin að reka Shakespeare fyrr í vikunni.

Federico Fernandez, miðvörður Swansea, varð fyrir því óláni að koma gestunum yfir með sjálfsmarki en í upphafi seinni hálfleiks bætti Shinji Okazaki við marki fyrir Leicester sem reyndist vera sigurmarkið. Alfie Mawson náði að minnka muninn fyrir heimamenn en lengra komust þeir ekki.

Á sama tíma vann Newcastle 1-0 sigur gegn Crystal Palace á heimavelli en spænski miðjumaðurinn Mikel Merino skoraði eina mark leiksins undir lok venjulegs leiktíma.

Var þetta fyrsta mark hans fyrir félagið en félagið gekk nýlega frá kaupunum á Merino eftir góða frammistöðu í fyrstu leikjum tímabilsins sem lánsmaður frá Dortmund í Þýskalandi.

Þá sótti Bournemouth þrjú stig til Stoke í 2-1 sigri í fallbaráttuslag í dag en þetta var aðeins annar sigur Bournemouth á tímabilinu og sá fyrsti á útivelli.

Andrew Surman og Junior Stanislas komu Bournemouth yfir með tveimur mörkum á stuttum tíma í fyrri hálfleik en Mame Diouf náði aðeins að laga stöðuna fyrir Stoke sem situr í fallsæti með átta stig eftir leikinn.