„Leyndardómsfullu fólksflutningarnir“ hvorki flokknum né frambjóðendum til framdráttar

Rúmlega 550 manns sóttu um aðalsæti fyrir hönd Heimdallar á Sambandsþing ungra Sjálfstæðismanna sem fram fer á Eskifirði um helgina. Heimdallur, félag ungra sjálfstæðismanna í Reykjavík, hefur 263 sæti á þinginu eða 45 prósent þingsætanna 585. Því mun aðeins helmingur þeirra sem sóttu um aðalsæti fá að kjósa á þinginu.

Nokkur spenna ríkir fyrir þinginu þar sem kosið verður til formanns. Í framboði eru Ingvar Smári Birgisson og Ísak Rúnarsson. Borið hefur á því að fjölmargir ungir sjálfstæðismenn, eða vinir ungra sjálfstæðismanna, hafi flutt lögheimili sitt til Reykjavíkur til að reyna að komast á þingið.

Þannig fluttu á dögunum sjö ungir karlmenn lögheimili sitt að Álftamýri 73 í Reykjavík. Hið sama er að segja um sex ungmenni sem nýlega voru skráð til heimilis að Skildinganesi 18 í Skerjafirðinum. Ekkert bendir til þess að unga fólkið búi þar heldur aðeins flétta til að geta sem Reykvíkingur skráð sig sem fulltrúi Heimdalls á þingið um helgina. Dæmin ku vera mun fleiri.

Ingvar Smári, frambjóðandi til formanns, hefur fullyrt að stjórn Heimdalls sé heilshugar á bak við Ísak Rúnarsson. Hafi stjórn Heimdalls gætt þess við val á lista sinn að útiloka þá frá þinginu sem ekki eru yfirlýstir stuðningsmenn Ísaks.

Í tilkynningu frá stjórn Heimdalls segir að Heimdallur sé ekki yfir gagnrýni hafinn. Ákveðið hafi verið að skila nýjum lista þeirra 263 sem fá atkvæðisrétt á þinginu til SUS. SUS hafi til klukkan fimm síðdegis að samþykkja listann.

Stjórn Heimdalls segir afar leitt að geta ekki orðið við beiðnum allra sem þingið vilja sækja. Rúmlega helmingur umsækjenda mun ekki hljóta aðalsæti á þinginu. Kerfið sé skaðlegt, bæði fyrir starf ungmennafélag sem og flokkinn.

Varla komi til þess að sambandsþing sé haldið án þess að atburðir liðinna vikna eigi sér stað. Er þar vísað til hinna „leyndardómsfullu fólksflutninga“ sem Vísir hefur fjallað um. Það sé hvorki frambjóðendum né flokknum til framdráttar.

Stjórn Heimdallar vilji opna þingið og breyta þessu „fráleita kerfi“.

Sem fyrr segir fer þingið fram á Eskifirði um helgina og stendur frá föstudegi til sunnudags. Skráning er á föstudaginn og verður slegið upp teiti í Valhöll, félagsheimili Eskfirðinga, um kvöldið. Á laugardeginum er málefnastarf, afgreiðslna ályktana og spjall við ráðherralið Sjálfstæðisflokksins sem mætir til Eskifjarðar, öll sem eitt.

Um kvöldið er hátíðarkvöldverður í Valhöll og „áframhaldandi glens og grín að hætti ungra sjálfstæðismanna“ í Valhöll fram á nótt. Á sunnudeginum er svo gengið til kosninga þar sem meðal annars nýr formaður verður kjörinn. 

Áhugasamir geta kynnt sér dagskrána nánar hér.