Taka til í pólitíkinni í Frakklandi

Franska þingið hefur samþykkt með miklum meirihluta að stöðva fjárútlát til þingmanna, sem þeir geta svo deilt út með miklu frelsi. Nokkur hneykslismál hafa komið upp í Frakklandi að undanförnu þar sem þingmenn höfðu farið frjálslega með opinbert fé og jafnvel ráðið fjölskyldumeðlimi sína í tilbúin störf sem þeir þurftu ekki að sinna.

Í síðustu viku samþykkti þingið að banna þingmönnum og ráðherrum að ráða fjölskyldumeðlimi sína.

Að taka á þessu var eitt af helstu kosningaloforðum Emmanuel Macron, forseta Frakklands. Það er liður í áætlun hans að byggja upp traust almennings á stjórnmálamönnum, samkvæmt frétt AFP fréttaveitunnar.

Samkvæmt nýrri skoðanakönnun segjast einungis 36 prósent Frakka vera ánægðir með störf forsetans, sem hefur einungis verið tæpa þrjá mánuði í starfi sínu. Hann hefur verið gagnrýndur ýmislegt og þar á meðal að hafa ætlað að stofna sérstakt embætti forsetafrúar, sem ekki hefur verið til staðar í Frakklandi.

Þá hefur hann deilt opinberlega við yfirmann herafla Frakklands um niðurskurð til hernaðarmála.

Þá er útlit fyrir frekari vandræði fyrir Macron í næsta mánuði. Verkalýðsleiðtogar hafa kallað eftir umfangsmiklum verkföllum vegna fyrirhugaðra breytinga forsetans á lögum varðandi vinnandi fólk.