Charlie Gard er látinn

Hinn ellefu mánaða gamli Charlie Gard er látinn. Charlie þjáðist af afar sjaldgæfum og banvænum hrörnunarsjúkdómi. Barátta foreldra hans til að fá að fara með hann til Bandaríkjanna í umdeild meðferð hefur vakið heimsathygli.

Connie og Chris Gard, foreldrar Charlie, gáfust nýverið upp á þeirri baráttu, en vildu fara með hann heim og eyða nokkrum dögum með honum þar. Hjónunum tókst þó ekki að finna umönnunarteymi til að fylgjast með honum á heimili þeirra, eins og dómstólar sögðu til um þyrfti.

Charlie var því fluttur á ótilgreint barnasjúkrahús í Bretlandi þar sem hann lést í dag.

Mál hans vakti athygli um allan heim og bauðst Páfagarður jafnvel til að annast Charlie, svo hann yrði ekki tekinn úr öndunarvél.