Leikmenn sem Mourinho hafnaði en slógu svo í gegn

Ef marka má breska fjölmiðla þá mun Romelu Lukaku ganga til liðs við Manchester United á næstu dögum. Verði af félagaskiptunum mun Lukaku aftur spila undir stjórn Jose Mourinho, en Portúgalinn seldi Lukaku frá Chelsea árið 2014.

Í tilefni að því hefur SkySports birt samantekt á leikmönnum sem þóttu ekki nógu góðir fyrir Mourinho en slógu í gegn á nýjum stað.

Kevin de Brunye

Kevin de Brunye kostaði Manchester City 54,5 milljónir punda aðeins ári eftir að Mourinho seldi hann frá Chelsea fyrir 18 milljónir.

Mourinho kallaði de Bruyne „ósáttan krakka“ og gagnrýndi frammistöðu hans á æfingum. Á síðasta tímabili átti hann 18 stoðsendingar fyrir Manchester City, meira en nokkur annar í úrvalsdeildinni.

Leonardo Bonucci

Leonardo Bonucci var ekki nógu góður fyrir Mourinho hjá Inter Milan og var seldur til Juventus fyrir 3,4 milljónir punda árið 2009.

Síðan hefur hann unnið ítölsku Serie A sex sinnum með Juventus og var eftirsóttur síðasta sumar, meðal annars af Pep Guardiola hjá Manchester City.

Juan Mata

Juan Mata fékk ekki mikið af sénsum undir Mourinho hjá Chelsea. Hann var seldur til Manchester United í janúar 2014 fyrir 37,1 milljón punda.

Spánverjinn knái hefur verið afar mikilvægur á Old Trafford, ekki síst eftir að Mourinho tók við völdunum þar. 

Mourinho segir Mata hafa passað mun betur inn í lið United heldur en hann gerði á sínum tíma hjá Chelsea.

David Luiz

David Luiz fór frá Chelsea árið 2014 fyrir 50 milljónir punda undir stjórn Mourinho. Hann var í liði Brasilíu sem tapaði 7-1 fyrir Þjóðverjum á heimsmeistaramótinu í Brasilíu aðeins mánuði eftir söluna og leit út fyrir að ferill hans væri á niðurleið.

Hann snéri svo aftur til Lundúnaliðsins sumarið 2016 og var lykilmaður í liðinu sem hampaði Englandsmeistaratitlinum í vor.