Borgarastyrjöld eða aðeins einangrað tilvik

Óljóst er hversu mikils stuðnings Oscar Pérez, lögregluþjónn sem stal þyrlu og varpaði úr henni sprengjum á hús hæstaréttar landsins í Karakas, höfuðborg Venesúela, í gær nýtur. Pérez birti myndband á Instagram í gær þar sem hann lýsti yfir ábyrgð á árásinni. Fyrir aftan hann stóðu fjórir grímuklæddir og þungvopnaðir menn.

„Við erum bandalag hermanna, lögreglumanna og almennra borgara sem vill koma á jafnvægi í Venesúela og vinna gegn glæpamönnunum sem fara með stjórn ríkisins,“ sagði Pérez í myndbandinu. Hann bætti því við að bandalagið aðhylltist enga stjórnmálastefnu og studdi engan flokk. Þeir væru einfaldlega föðurlandsvinir.

Fjórum handsprengjum var varpað á hæstaréttarbygginguna og þá var fimmtán skotum skotið að húsi innanríkisráðuneytisins, að því er segir í frétt Reuters. Enginn særðist í árásinni.

Nærri dagleg fjöldamótmæli hafa verið gegn ríkisstjórn Nicolas Maduro forseta undanfarna mánuði og hafa nærri hundrað manns farist í átökum við her og lögreglu. Mótmæli hafa þó verið tíð frá árinu 2014 og hafa um það bil fimmtíu til viðbótar látið lífið síðan þá. Talið er að um tíu þúsund hafi verið handtekin við mótmæli undanfarin ár.

Helstu ástæður mótmælanna eru spilling og afar slæmt ástand efnahagsmála þar í landi. Samkvæmt Gallup telja flestir íbúar Venesúela ríkisstjórnina spillta. Þá er gríðarleg verðbólga og mikill skortur á matvælum og öðrum nytjavörum í landinu.

Í könnun Datos telur rúmur helmingur að sósíalísk ríkisstjórn Maduros beri ábyrgð á einkar slæmu ástandi efnahagsmála. Sjálfur hefur Maduro sagt að kapítalistar heyi efnahagslegt stríð gegn ríki sínu.

Ef Pérez nýtur raunverulegs stuðnings gæti verið að óeirðir og mótmæli undanfarinna ára taki á sig nýja mynd og umbreytist í raunverulega borgarastyrjöld. Einnig er mögulegt að Pérez spili sig nú stærri en hann er og að Maduro stafi ekki raunveruleg hætta af honum.

Forsetinn kallaði árásina hryðjuverkaárás. Þá skipaði hann hernum að vera vel á varðbergi. „Ég hef skipað hernum öllum að standa vörð um friðinn. Fyrr eða síðar munum við handsama þá sem frömdu þessa hryðjuverkaárás,“ sagði Maduro í gær.

Maduro sagði að árásarmennirnir vildu fremja valdarán. Fyrr í vikunni, á þriðjudag, ítrekaði Maduro ásakanir sínar í garð Bandaríkjanna um að ríkisstjórn Donalds Trump Bandaríkjaforseta styddi slíkar tilraunir. Á mánudag tilkynnti hann um að fimm hefðu verið handteknir, grunaðir um að leggja grunninn að innrás Bandaríkjanna í Venesúela.