Óvíst hvenær kísilverið hefur starfsemi á ný

Óvíst er hvenær ljósbogaofn í kísilveri United Silicon í Helguvík verður ræstur á ný en íbúar fá tilkynningu tveimur dögum áður en það gerist.

Þetta segir Sigrún Ágústsdóttir sviðsstjóri hjá Umhverfisstofnun. Stofnunin er um þessar mundir að yfirfara endurræsingaráætlun United Silicon sem fyrirtækið vann í samráði við norska ráðgjafa sem fengnir voru til að komast að því hvað veldur ólykt sem stafar frá kísilverinu.

Lítill rekstrartími ljósbogaofnsins vegna fjölmargra ofnstöðvana og keyrsla ofnsins á lágu álagi hefur verið helsta vandamál verksmiðjunnar. Alvarlegasta afleiðingin af þessum litla rekstrartíma var losun lyktar en henni fylgdu margþætt óþægindi fyrir íbúa Reykjanesbæjar. 

Umhverfisstofnun tók ákvörðun um stöðvun á starfsemi kísilversins í síðasta mánuði. Í kjölfarið réð United Silicon norska ráðgjafarfyrirtækið Multiconsult til að kanna aðstæður í verksmiðjunni. 

„Fyrirtækið hefur verið með ráðgjafa á sínum snærum sem sent hefur stofnuninni skýrslu hvað það varðar. Úttektaraðili, annað norskt fyrirtæki, aðstoðar Umhverfisstofnun við yfirferð skýrslu fyrirtækisins. Ekki er hægt að segja á þessari stundu hvenær yfirferðinni lýkur eða hvenær ofninn verði ræstur. Stofnunin hefur kallað eftir ítarlegri upplýsingum sem ekki eru allar komnar. Gert er ráð fyrir að íbúum verði tilkynnt með tveggja sólarhringa fyrirvara um endurræsingu,“ segir Sigrún Ágústsdóttir hjá Umhverfisstofnun.