Klopp með dauðþreytta leikmenn og alltof lítinn hóp hjá Liverpool

Liverpool á veika von að vinna titil á þessari leiktíð en aðeins einn möguleiki er eftir; Englandsmeistaratitillinn. Lærisveinar Jürgen Klopps kvöddu báðar bikarkeppnirnar í síðustu viku auk þess sem liðið tapaði fyrir botnliði Swansea í ensku úrvalsdeildinni um þar síðustu helgi.

Janúar er búinn að vera skelfilegur hjá Liverpool-liðinu sem virðist dauðþreytt og tölfræðin hjálpar til við að sanna það. Klopp lætur sína menn hlaupa mikið og pressa en þessi skemmtilegi fótbolti kom Liverpool á topp ensku úrvalsdeildarinnar í nóvember. Nú virðist bensínið búið.

Sé litið á tölfræðina yfir hvaða lið hlaupa mest, eins og Sky Sports gerir í úttekt sinni, kemur í ljós að Liverpool-liðið hleypur langmest. Það er með hæstu heildartöluna og langflesta sprettina.

Sjá einnig:Víkingaklappið boðar bara vandræði á Anfield

Þessi leikaðferð Klopps virðist vera að koma niður á liðinu núna þar sem hann gerir ekki mikið af breytingum. Hann er búinn að gera 33 breytingar á byrjunarliðinu á þessu tímabili en aðeins þrjú lið hafa gert færri breytingar. Liverpool er búið að spila tíu leiki á 33 dögum síðan 27. desember og leikmennirnir virðast vera að finna fyrir þreytu.

Í leiknum gegn Swansea um síðustu helgi tóku leikmenn Liverpool færri spretti en áður á leiktíðinni. Þeir taka vanalega 537 spretti að meðaltali en á móti Swansea vantaði 57 upp á að ná þeirri tölu. Þetta er tíu prósent lækkun.

„Liverpool lítur út fyrir að vera orkulaust og lappirnar eru bara búnar hjá mönnum sem er áhyggjuefni,“ segir Jamie Carragher, fyrrverandi leikmaður liðsins og núverandi sparkspekingur Sky.

„Liverpool er sjötta besta liðið af sex bestu liðum deildarinnar en það var svona ofarlega lengi vel því það er með góðan knattspyrnustjóra og er ekki að spila í Evrópu.“

„Nú þegar liðið virðist alveg búið á því og er orkulaust erum við að sjá hversu gott það virkilega er. Þegar við tölum um liðið og hópinn hjá Liverpool sjá allir að hópurinn er engan veginn nógu stór né sterkur,“ segir Jamie Carragher.