Lögregluhundur réðst á saklausa konu

Þegar hin 52 ára gamla Desiree Collins fór út með ruslið snemma morguns í september átti hún ekki von á því að verða fyrir árás lögregluhunds. Sú var þau raunin og hefur hún nú höfðað mál gegn lögreglunni í St. Paul í Minnesota. Hundurinn Gabe var á ferð með lögregluþjónum sem voru að leita innbrotsþjófa þegar þeir römbuðu á Collins við ruslagám.

Myndband sem hefur verið gert opinbert vegna lögsóknarinnar sýnir árásina og hvernig Gabe sökkti tönnum sínum í handlegg Collins.

Sjá má hvernig Gabe rífur Collins til jarðarinnar og hvernig lögregluþjónar reyndu að aðstoða hana. Eftir um 30 sekúndur sleppti Gabe takinu.

„Hvað gerði ég honum?“ spurði Collins og svarið var: „Ekkert. Bara á röngum stað á röngum tíma.“ Hún hlaut sár á vinstri fót sinn og nokkur sár á hægri hendina.

Lögmenn Collins segja það þó ekki vera rétt. Þeir segja sökina vera umsjónarmanns Gabe, Thaddeus Schmidt. Í lögsókn Collins segir að Gabe hafi ekki hlýtt minnst tíu skipunum um að sleppa takinu á henni.

„Það sem við höfum hér er að algerlega saklaus kona var að fara út með ruslið og K-9 (heiti lögregluhunda í Bandaríkjunum) var ekki stýrt. Þetta hefði aldrei átt að gerast,“ sagði lögmaðurinn Andrew Noel við Star Tribune.

Yfirmaður lögreglunnar í St. Paul sendi yfirlýsingu til blaðsins þar sem hann sagði að um hræðilegt slys hafi verið að ræða sem hefði aldrei átt að gerast.

„Mér þykir leitt að þetta hafi gerst og hún hafi slasast. Sem lögregludeild óskum við þess að við gætum farið aftur í tíma og gert hlutina öðruvísi. Því miður getum við það ekki. Það sem við getum gert er að biðjast afsökunar og taka ábyrgð. Að læra af atvikinu svo við getum komið í veg fyrir að þetta geti komið fyrir einhvern annan,“ sagði Todd Axtell.

Schmidt var vikið úr starfi í einn dag fyrir að missa Gabe úr augsýn og að tilkynna ekki veru hans á svæðinu.

Samkvæmt frétt Washington Post greiddi sama lögregluembætti tvær milljónir dala í skaðabætur í mars. Það var vegna máls sem maður höfðaði gegn lögreglunni eftir að hann var bitinn af lögregluhundi. Í mars í fyrra greiddi lögreglan einnig annarri konu bætur eftir að hún var bitin af hundi í bakgarði sínum.