Vill auka tengiflug um Keflavík

„Ferðaþjónusta verður aldrei burðarás atvinnustarfsemi á jaðarsvæðum en hún er góð viðbót engu að síður og bætir mannlífið á stöðunum,“ segir Edward H. Huijbens, prófessor í ferðamálafræðum við Háskólann á Akureyri.

Framkvæmdastjóri Markaðsstofu Norðurlands telur mikilvægt fyrir ferðaþjónustu á Norðurlandi að hægt verði að fljúga innanlands frá Keflavík.

Edward ræddi þar um stöðu ferðaþjónustu á svæðum fjarri Keflavíkurflugvelli á ráðstefnu í Háskólanum á Akureyri um byggðir landsins á tímum breytinga. Í núverandi árferði þar sem hegðunarmynstur ferðamanna breytist muni svæði fjærst Keflavíkurflugvelli fara hvað verst út úr þeim breytingum.

„Ferðamönnum mun líklega ekki fækka hér á landi en hegðun þeirra breytist og ferðatíminn styttist. Þannig munu svæði sem fjærst eru suðvesturhorninu því finna mikið fyrir þessu breytta mynstri,“ segir Edward.

Árstíðasveiflur gistinátta eru mismunandi eftir landsvæðum. Til að mynda hefur ferðaþjónusta á höfuðborgarsvæðinu færst í að vera heilsársiðnaður á meðan árstíðarsveiflurnar fjarri höfuðborginni eru mun meiri. Þannig er nýting innviða og fjárfestinga lítill yfir stóran hluta ársins.

Arnheiður Jóhannesdóttir, framkvæmdastjóri Markaðsstofu Norðurlands, segir miklu máli skipta að flytja ferðamenn örugglega á Norður- og Austurland.

„Ég hef sagt lengi að ef á Norðurlandi eigi að þrífast alvöru ferðaþjónusta allt árið þarf samgöngur til. Það er ástæða þess að við erum að vinna með beint millilandaflug inn á þessi svæði,“ segir Arnheiður. „Það er mikilvægt að flogið sé reglulega frá Keflavík á Ísafjörð, Akureyri og Egilsstaði því það hefur borið góðan árangur.“

Að mati Arnheiðar er gríðarmikilvægt að dreifa ferðamönnum betur um landið og gengi krónunnar nú sé til trafala ef markmið er að flytja ferðamenn frá Keflavík út á land.

„Án þess að hafa skýr gögn fyrir framan mig hefur tilfinningin verið sú að raddir hafi verið háværastar í Þýskalandi um hátt verð til Íslands. Sá kúnnahópur, Þjóðverjar, hefur verið mjög stór markaður fyrir Norðurland. Því gætum við á Norður- og Austurlandi fundið hratt fyrir áhrifunum af erfiðu gengi og styttri ferðalögum gesta okkar,“ segir Arnheiður.