Margrét Lára: Verðum að sjá stóru myndina og vera glaðar

Margrét Lára Viðarsdóttir, fyrirliði íslenska kvennalandsliðsins í knattspyrnu, segir að liðið megi bera höfuðið hátt þrátt fyrir tap gegn Skotlandi, 1-2, í síðasta leik liðsins í riðlinum fyrir undankeppni EM, en liðið hefur tryggt sér sæti á mótinu sem fer fram í Hollandi næsta sumar.

„Við náðum okkar markmiðum; bæði að vinna riðilinn og komast á EM. Ef að við hefðum tapað fyrri leiknum úti og unnið hérna heima þá værum við í skýjunum, þannig við verðum að sjá stóru myndina og vera glaðar með þetta,” sagði Margrét.

„Hann var svo kaflaskiptur þessi leikur. Mér fannst við vera góða hluti, en duttum niður á köflum. Við byrjuðum leikinn illa og unnum okkurr svo inn í hann og mér fannst þetta vera 50-50 leikur í síðari hálfleik.”

„Mér fannst ekkert sanngjarnt að þær hefðu stolið þessu frekar en við þannig að jafntefli hefðu eflaust verið sanngjörn úrslit.”

Íslenska landsliðið má, þrátt fyrir tapið í kvöld, vel við una því liðið hefur tryggt sig inn á þriðja Evrópumótið í röð.

„Ég hef verið í riðlakeppni í undankeppni EM og ekki komist á EM. Við megum ekki gleyma því að þetta er stórkostlegur árangur og við töpuðum einum leik í þessum riðli gegn frábæru liði Skota. Við getum verið stolt og ánægð þetta."

Rúmlega sex þúsund manns mættu á Laugardalsvöll í kvöld, annan leikinn í röð, og var stemningin góð á pöllunum.

„Það er bara klikkað að líta upp í stúku og ég treysti því að allt þetta fólk komi með okkur til Hollands því við þurfum á stuðningi að halda. Við ætlum að nota veturinn vel og bæta okkur allar svo við verðum tilbúnar í baráttuna á næsta ári,” en hvernig verður fagnað í kvöld?

„Ég ætla ekki að segja þér það. Nei, við ætlum bara að hafa gaman og njóta stundarinnar. Vera hópurinn saman og fara út að borða og gera eitthvað skemmtilegt, bara aðeins að leyfa okkur að njóta,” sagði fyrirliðinn.