Hvítabjörninn reyndist mjólkandi birna

Hvítabjörninn sem felldur var um helgina við Hvalnes á Skaga, var fullorðin birna. Hún var með mjólk í júgri þannig að ekki er langt síðan að húnn, eða húnar, fylgdu henni.

Þetta kemur fram í fréttatilkynningu frá Keldum og Náttúrufræðistofnun þar sem hvítabjörninn var krufinn í gær. Þau Karl Skírnisson dýrafræðingur og Ólöf Guðrún Sigurðardóttir dýralæknir krufðu ísbjörninn og nutu við það aðstoðar Þorvalds Björnssonar hamskera.

Meðalstórt dýr og vel í holdum

Um er að ræða meðalstórt dýr, en lengd frá trýni aftur á dindil eru 207 sentímetrar en þyngd 204 kíló. Þá er birnan mun feitari en þeir birnir sem hingað hafa synt undanfarin ár. Áætlað er að um 30 prósent líkamsþyngdarinnar hafi verið spik þannig að ljóst er að dýrið hefur nærst eðlilega undanfarna mánuði.

„Nýleg smásár voru á haus og bóg en óljóst er hvernig dýrið fékk þessar skeinur. Grafið hafði í bógsárinu þannig að það var að minnsta kosti nokkurra daga gamalt,“ segir í tilkynningunni.

Fjölmörg sýni voru tekin úr dýrinu sem svo verða rannsökuð næstu daga og mánuði, „meðal annars sýni sem ætluð eru til mælinga á styrk þrávirkra klórkolefnissambanda, þungmálmum, styrk geislavirkra efna og mótefnum gegn veirum. Margvísleg vefjasýni voru tekin til vefjameinafræðilegra rannsókna.“

Skinnið sútað og hauskúpa og bein hreinsuð

Þá verður sníkjudýra í meltingarvegi leitað og uppruni fæðuleifa sem fundust í ristli greindur en maginn reyndist vera tómur.

„Leitað verður að tríkínum í sýnum úr tungu, þind og kjálkavöðva en um helmingur hvítabjarna í Austur-Grænlandsstofninum er með þetta sníkjudýr sem ekki þekkist á Íslandi og setur Ísland þar með í hóp örfárra landa þar sem tríkínur ógna ekki heilbrigði manna,“ segir jafnframt í tilkynningunni.

Fyrirhugað er að súta skinnið og bein og hauskúpa verða hreinsuð á Náttúrufræðistofnun þar sem beinagrindin verður varðveitt. Þá verður birnan verður aldursgreind en það er gert með því að telja árhringi í tannrótum en athuganir á tönnum geta einnig gefið aðrar mikilvægar upplýsingar um lífsferil viðkomandi dýra.