Enginn veit fyrir víst hvers vegna ísbirnirnir koma hingað

Tæpur sólarhringur er síðan þessi miklar skepna gekk á land norður á Skaga og mætti þar örlögum sínum. Hræið er nú komið í hendur Náttúrufræðistofnunar, þar sem það verður rannsakað í þaula.

Það var heimilisfólk á Hvalnesi á Skaga sem varð bjarnarins vart seint í gærkvöldi, aðeins nokkur hundruð metrum frá bænum þar sem bæði börn og dýr voru að leik. Kölluð var til vön skytta og dýrið fellt með einu skoti í hálsinn.

Stoppuð upp eins og hinir birnirnir

„Þessi birna er 204 kíló, við vigtuðum hana fyrir norðan," segir Þorvaldur Þór Björnsson hamskeri hjá Náttúrufræðistofnun sem fór norður síðustu nótt og fygldi birnunni í bæinn.

„Við erum einhverja klukkutíma að taka sýni úr henni og síðan í framhaldinu verður stefnt að því að stoppa hana upp eins og aðrir birnir sem hafa komið hingað inn til náttúrufræðistofnunar undanfarin ár."

Verðugt verkefni að rannsaka dýrin vel

Þetta er fimmti ísbjörninn sem gengur hér á land frá árinu 2008. Tannrannsóknir hafa gefið mikla innsýn í lífssögu dýranna og kom meðal annars í ljós að hin svokallaða Rekavíkur-Birna sem hingað kom 2011 var erfðafræðilega mun skyldari Norður-Amerískum bjarndýrum en búast mætti við af ísbjörnum á Grænlandi eða Svalbarða.

Karl Skírnisson dýrafræðingur hjá Rannsóknastöðinni á Keldum segir það mikilvægt verkefni að rannsaka bjarndýrin vel og um leið reyna að grennslast fyrir um það hvers vegna þau koma hingað.

Hafa líklega synt til Íslands

„Ég held það séu komnar einar fimm vísindagreinar um þessa fjóra bangsa sem hingað hafa synt á síðustu árum. Því sennilega hafa þeir synt allir nema kannski þessi sem kom í Þistilfjörð, hann gæti hafa borist eins og korktappi undan vatni og vindum," segir Karl.

„Þannig að það er mjög áhugavert að skoða þetta. Líka, af hverju leggja dýr í svona langferð? Það er mjög forvitnalegt og menn vita ekki svarið."