Kínverjar hafa sett saman metnaðarfulla áætlun sem á að stuðla að því að Kína verði orðið stórveldi í alþjóðlegum fótbolta fyrir árið 2050.



Kínversk stjórnvöld hafa sett saman ítarlegan bækling um dagskrána næstu þrjá áratugina en til að byrja með á að reyna að fá 50 milljónir kínverska barna og fullorðinna til þess að spila fótbolta.



Kínverjar ætla síðan að byggja eða endurnýja sextíu þúsund knattspyrnuvelli á næstu sex árum.



Markmiðið er að árið 2050 eigi Kína heimsklassa fótboltalið hvort sem er landslið eða félagslið.



Xi Jinping, forseti Kína, hefur mikinn metnað fyrir hönd fótboltans í landinu. Hann hefur látið hafa það eftir sér að hann vilji sjá Kína komast inn á Heimsmeistarakeppnina, halda heimsmeistarakeppnina og vinna heimsmeistarakeppnina.



Kínversk karlalandsliðið hefur aðeins komist á eitt heimsmeistaramót en það var á HM í Japan og Suður-Kóreu árið 2002 þegar liðið tapaði öllum þremur leikjum sínum.



Kína endaði í sjöunda sæti í síðustu Asíukeppni en besti árangur kínverska liðsins er frá 1984 og 2004 þegar kínverska karlalandsliðið endaði í öðru sæti.



Kínversku konurnar komust í átta liða úrslitin á HM í Kanada á síðasta árið en urðu þá að sætta sig við 1-0 tap á móti verðandi heimsmeisturum Bandaríkjanna.



Kínverska kvennalandsliðið hefur verið með á sex heimsmeistaramótum og spilaði til úrslita árið 1999. Það er því mun styttra fyrir þær á toppinn.



Íslensku landsliðsmennirnir Eiður Smári Guðjohnsen, Viðar Örn Kjartansson og Sölvi Geir Ottesen spiluðu allir í kínversku deildinni á síðustu leiktíð og Sölvi Geir verður í ár sá fyrsti til að spila fyrir tvö kínversk félög.