Koscielny hetja Arsenal gegn Newcastle | Sjáðu markið

Franski miðvörðurinn Laurent Koscielny skoraði eina mark leiksins í 1-0 sigri Arsenal á Newcastle í dag en með sigrinum er Arsenal komið með tveggja stiga forskot á toppnum eftir jafntefli Leicester í dag.

Newcastle sat aftarlega í leiknum og beitti öflugum skyndisóknum og fengu leikmenn liðsins nokkur góð tækifæri til þess að skora fyrsta mark leiksins.

Það var hinsvegar miðvörðurinn Koscielny sem skoraði fyrsta og eina mark leiksins tuttugu mínútum fyrir leikslok. Stýrði hann boltanum í netið af stuttu færi eftir skalla frá Olivier Giroud.

Með sigrinum styrkti Arsenal stöðu sína á toppi ensku úrvalsdeildarinnar eftir markalaust jafntefli Leicester gegn Bournemouth en Manchester City gæti saxað á forskot Arsenal með sigri á Watford í seinasta leik dagsins.