Ighalo ætlar ekki að yfirgefa nýliðana í janúar

Einn heitasti framherji ensku úrvalsdeildarinnar, Odion Ighalo, segist ekki vera á förum frá Watford þegar hann var spurður út í meintan áhuga Atletico Madrid.

Hinn 26 árs gamli Ighalo hefur slegið í gegn í ensku úrvalsdeildinni í vetur en hann hefur skorað 14 mörk í 19 leikjum og er í baráttunni um gullskóinn.

Ighalo hefur verið lykilleikmaður í liði Watford sem hefur komið á óvart og situr í 9. sæti þegar tímabilið er hálfnað.

„Ég vill enda tímabilið vel með Watford og sýna og sanna að það eru góðir leikmenn í þessum leikmannahóp. Þegar þú einbeitir þér að því þá hlustaru ekki á sögusagnir um önnur lið,“ sagði Ighalo um meintan áhuga Atletico Madrid.