Joe Allen er að spila upp á framtíð sína

Joe Allen, miðjumaður Liverpool, viðurkennir að hann er núna að spila upp á framtíða sína hjá félaginu.

Þessi 25 ára gamli Walesverji hefur aðeins byrjað einn leik í deildinni fyrir Liverpool á þessari leiktíð en það var í 2-0 tapinu gegn Newcastle í byrjun desember.

Allen er með samning út næsta tímabil en samningaviðræður við hann, sem hófust í mars á síðasta ári, hafa nú verið settar á ís þar sem hann er ekki lengur lykilmaður í liðinu.

„Það eru allir afskaplega hljóðlátir núna hvað varðar þennan samning þannig ég veit ekki alveg hvað er að gerast,“ segir Allen.

„Ég er bara búinn að byrja einn leik í deildinni á þessari leiktíð og ég vil spila meira. Ég held að það sé frekar augljóst.“

„Nú þarf ég bara að bíta á jaxlinn, gera það sem ég þarf að gera og standa mig. Það geri ég alltaf,“ segir Allen.

Staða Allens er ekki góð því Wales er á leiðinni á Evrópumótið og það hjálpar honum ekkert að spila svona lítið hjá Liverpool.

Aftur á móti gæti hann fengið meiri spiltíma á næstu vikum þar sem ellefu leikmenn Liverpool eru meiddir.