Alan Curtis stýrir Gylfa og félögum út tímabilið

Swansea City, lið íslenska landsliðsmannsins Gylfa Þórs Sigurðssonar, hefur nú tilkynnt að Alan Curtis muni klára tímabilið með liðinu en hann hefur starfað sem knattspyrnustjóri Swansea síðan að Garry Monk var rekinn 9. desember.

Alan Curtis hefur þegar stýrt liðinu í fimm leikjum og liðið hefur náð í fimm stig í þeim (1 sigur, 2 jafntefli og 2 töp). Liðið hefur haldið þrisvar sinnum hreinu. Curtis tók fyrst við liðinu til bráðabirgða en hefur nú tryggt sér starfið út tímabilið.

Swansea City er eins og er í 17. sæti ensku úrvalsdeildarinnar og aðeins tveimur stigum fyrir ofan fallsæti. Liðið tapaði 2-1 fyrir Manchester United um síðustu helgi þar sem Gylfi Þór Sigurðsson skoraði mark liðsins.

Huw Jenkins, stjórnarmaður Swansea City, hrósaði Alan Curtis fyrir framgöngu sína í þessum fimm leikjum og sagði ástæðu þess að enginn eftirmaður hafi verið klár vera sú að enginn hjá félaginu átti von í að lenda í þessum kringumstæðum.

Garry Monk gerði frábæra hluti með liðið í fyrra og liðið gerði einnig góðan hluti í fyrstu fjórum leikjunum. Eftir það gekk hinsvegar allt á afturfótunum sem endaði með að Monk var rekinn.