Zaha gefst upp á enska landsliðinu

Vængmaður Crystal Palace, Wilfried Zaha, hefur sent inn beiðni til alþjóða knattspyrnusambandsins, FIFA, um að fá að spila fyrir landslið Fílabeinsstrandarinnar.

Zaha er fæddur í Afríku en alinn upp í Englandi. Hann hefur þegar spilað tvo landsleiki fyrir England en þar sem það voru vináttulandsleikir fær hann væntanlega leyfi hjá FIFA til þess að spila fyrir Fílabeinsströndina.

Vængmaðurinn stefnir á að vera orðinn löglegur landsliðsmaður Fílabeinsstrandarinnar fyrir jól svo hann geti spilað með landsliðinu í Afríkukeppninni í janúar.

Zaha er löngu orðinn pirraður á því að vera aldrei valinn í enska landsliðið og hefur nú ákveðið að gefast upp í þeirri baráttu.