Kai kominn með heimili: "Eins og að vinna í lottó“

Hundurinn Kai, sem komst í sviðsljósið eftir að hafa verið skilinn eftir á skoskri lestarstöð nú í janúar, er kominn með heimili. Saga hundsins vakti mikla athygli, en hann fannst á lestarstöðinni með eigur sínar í ferðatösku; púða, leikfang, skál og mat.

Góðgerðarsamtökin SPCA tóku Kai að sér og bárust þeim hundruð beiðna frá fólki sem vildi eiga hundinn. Það var síðan Ian Russell sem datt í lukkupottinn og er nú nýr eigandi Kai. Hann segist vera í skýjunum yfir nýja fjölskyldumeðlimnum og telur það hafa verið örlögin sem leiddu þá tvo saman. Russell er 52 ára en nú rétt fyrir jól missti hann dalmatíuhundinn sinn Mica. „Hjarta mitt brotnaði,“ sagði Russell í samtali við BBC.

„Það að hafa fengið að taka Kai að mér er eins og að vinna í lottó. Ég hlakka mjög til að fá að taka hann heim og tengjast honum,“ sagði hann jafnframt.

Formaður samtakanna SPCA, Alan Grant, sagði tilboð um að taka Kai hafi borist frá öllum heimshornum. Hann sagði sögu Kai sorglega og að hún minnti marga á sögu bangsans Paddington, sem fannst einn á lestarstöð með ferðatöskuna sína.

Innlegg frá Scottish SPCA.