Klopp: Vetrarfrí myndi hjálpa enska landsliðinu

Jurgen Klopp, knattspyrnustjóri Liverpool, telur að vetrarfrí í ensku deildarkeppninni líkt og þekkist annarstaðar í Evrópu, myndi hafa jákvæð áhrif á enska landsliðið.

Ólíkt öðrum deildum í Evrópu er þétt dagskrá af leikjum í enska boltanum yfir jólatímann en lærisveinar Klopp leika þrjá leiki á átta dögum.

Klopp telur að þetta komi niður á enska landsliðinu og að leikmennirnir séu fyrir vikið þreyttir þegar enska landsliðið tekur þátt í stórmótum á sumrin.

„Það eru of margir leikir hérna, það eru engin hlé gerð á keppnunum enda of margar keppnir í boði. Það er augljóst að þetta er ekki gott fyrir leikmennina. Það eru mjög góðir leikmenn í enska landsliðinu en þeir hafa ekki fengið neina hvíld sem gerir verkefnið mun erfiðara.“