Þær skosku eru sýnd veiði en ekki gefin

Íslenska kvennalandsliðið slapp við tvö erfið lið þegar dregið var í undankeppni EM í gær. Íslenska liðið lenti í riðli með Skotlandi, Hvíta-Rússlandi, Slóveníu og Makedóníu.

„Það getur vel verið að þetta líti vel út á einhverjum pappírum. Kvennafótboltinn er bara á svo mikilli uppleið og þessi lið eru alltaf að styrkjast. Þetta verður erfiðara og erfiðara með hverju árinu,“ sagði Margrét Lára Viðarsdóttir, fyrirliði íslenska liðsins. Það er búist við að baráttan um efsta sætið í riðlinum verði á milli Íslands og Skotlands.

„Skotar eru með hörkulið og þær eru líka að koma upp með marga efnilega leikmenn. Þær eru því sýnd veiði en ekki gefin og eru með hrikalega sterkt lið,“ sagði Margrét Lára. Ísland gat lent í riðli með tveimur sterkum þjóðum sem voru með liðinu í undankeppni HM 2015.

„Það er hægt að segja að við séum aðallega heppnar að sleppa við Danmörku og Sviss úr öðrum styrkleikaflokki. Þrátt fyrir það þá tel ég að við fáum þriðja sterkasta liðið úr þeim flokki. Þetta verður mjög erfitt en það er líka skemmtilegt að fá ný lið. Við höfum mikið verið að spila á móti þessum sömu liðum endalaust. Það er því gaman að fá nýjar áskoranir og ný verkefni,“ sagði Margrét Lára.

Íslenska liðið var í fyrsta sinn í fyrsta styrkleikaflokki í þessum drætti og öll liðin í riðlinum voru því neðar á styrkleikalistanum.

„Það er magnað afrek og ég held að fólk átti sig ekki á því hvaða lið við erum að skilja eftir í öðrum styrkleikaflokki. Við erum klárlega að njóta góðs að því núna. Við verðum að nýta okkur þennan meðbyr, vinna þennan riðil og fara beint á EM. Það er markmiðið,“ segir Margrét Lára. Hún hefur tekið þátt í tveimur úrslitakeppum EM, bæði í Finnlandi 2009 og í Svíþjóð 2013.

„Það hefur tekist tvisvar að komast á EM en það væri samt óneitanlega gaman að brjóta blað í sögunni og komast beint á EM,“ segir Margrét Lára að lokum en íslenska liðið sló Írland út í umspili fyrir EM 2009 og Úkraínu í umspili fyrir EM 2013.