Tölvumyrkur vofir yfir heiminum

Almennt er talið að allt sem fer út á internetið, svo sem ljósmyndir, tölvupóstur og bloggfærslur, verði þar til eilífðarnóns. Aldeilis ekki, segir Vinton G. Cerf sem státar af því að vera meðal upphafsmanna internetsins.

„Við hendum í kæruleysi öllum okkar gögnum inn í það sem gæti orðið upplýsingasvarthol án þess að gera okkur grein fyrir því,“ segir Cerf í viðtali við breska dagblaðið The Guardian. Þegar fram líða tímar verða nefnilega forritin sem þarf til þess að lesa þessar upplýsingar úrelt. Og búnaðurinn sem nú er notaður til að keyra þessi fornu forrit verður ekki lengur til.

„Við viljum ekki sjá stafrænt líf okkar hverfa. Ef við viljum varðveita það, þá þurfum við að sjá til þess að í framtíðinni verði enn hægt að birta þessa tölvugerðu hluti sem við búum til í dag,“ segir Cerf.

Hann ræddi þessi mál á ársfundi bandarísku vísindasamtakanna AAAS þar sem hann sagðist óttast að kynslóðir framtíðarinnar yrðu í vandræðum með að finna upplýsingar um þann tíma sem við lifum á. Hin mikla upplýsingaöld internetsins muni hverfa í myrkur upplýsingatóms, hina myrku tækniöld.

Lausnin á þessum vanda segir hann, samkvæmt frásögn BBC, geta falist í því að taka eins konar „röntgen-skyndimyndir“ af gögnunum, þar sem sæist í smáatriðum hvers konar forrit og stýrikerfi hafi verið notuð ásamt lýsingum á þeim búnaði sem notaður var til að keyra þessi forrit.

Enn sem komið er sé slík tækni þó ekki í sjónmáli, þannig að menn þurfi að varðveita persónuleg gögn og hvaðeina sem þeim finnst mikilvægt með öðrum hætti en að setja það á netið eða geyma það í tölvum okkar.

„Ef þér þykir virkilega vænt um einhverjar ljósmyndir, þá skaltu prenta þær,“ hefur The Guardian eftir honum.

Cerf er orðinn 71 árs og er nú varaforseti Google, en átti á áttunda áratug síðustu aldar, ásamt félaga sínum Bob Kahn, stærstan þátt í því að gera internetið að veruleika. Þeir störfuðu þá báðir við rannsóknir hjá bandaríska varnarmálaráðuneytinu, þar sem þeir unnu að þróun samskiptanets sem síðar varð að internetinu.