Perez: Satt að United og Tottenham hafa áhuga á mér

Ayoze Pérez, framherji Newcastle í ensku úrvalsdeildinni, staðfesti áhuga Manchester United og Tottenham á sér í viðtali við spænska útvarpsstöð í dag.

Peréz hefur spilað vel fyrir Newcastle síðan hann kom til liðsins fyrir síðustu leiktíð en hann skoraði sjö mörk á sínu fyrsta tímabili.

Spánverjinn er búinn að skora fjögur mörk á þessari leiktíð, þar af tvö sigurmörk gegn Bournemouth og Tottenham.

Hann hefur verið orðaður við Manchester United og Tottenham að undanförnu og sá orðrómur er sannur ef marka má orð leikmannsins.

„Það er satt að þessi lið hafa áhuga á mér og það gefur mér mikið. Það er mikill sannleikur hvað varðar þennan áhuga Manchester United og Tottenham en ég er ánægður hjá Newcastle,“ sagði Ayoze Pérez við Radio Club Tenerife.