Fabregas íhugar lögsókn

Cesc Fabregas er samkvæmt enskum fjölmiðlum að íhuga að leita réttar síns vegna ummæla Pat Nevin í útvarpsþætti BBC í síðustu viku.

Fyrr í haust var því haldið fram að leikmaður Chelsea væri svo mótfallinn Jose Mourinho, þáverandi stjóra Chelsea, að hann vildi frekar tapa leikjum en að vinna þá fyrir Mourinho.

Sjá einnig: Leikmaður Chelsea: Myndi frekar tapa en að vinna fyrir Mourinho

Mourinho var rekinn frá félaginu í síðustu viku og þá rifjaði Garry Richardson, stjórnandi útvarpsþáttar á BBC, upp þetta mál.

„Já, það var Cesc Fabregas, var það ekki?“ sagði Nevin þá. Hvort að ummælin voru einfaldlega vanhugsuð hjá Nevin þá er ljóst að hann var með orðum sínum að bendla Fabregas við áðurnefnda frétt og það mun Spánverjanum hafa líkað illa.

Sjá einnig: Fabregas stendur ekki fyrir uppreisn innan herbúða Chelsea

Stuðningsmenn Chelsea bauluðu duglega á nokkra leikmenn liðsins fyrir leikinn gegn Sunderland um helgina og var Fabregas einn þeirra. Hann hefur þó neitað að vinna gegn Mourinho og var einn fyrsti leikmaður liðsins til að senda stjóra sínum kveðju á samfélagsmiðlum eftir að Portúgalinn var rekinn.

Nevin á 20 ára atvinnumannaferil að baki sem knattspyrnumaður og lék með Chelsea frá 1983 til 1988.